呼之欲出？迪比利成金球獎大熱門！

隨住歐聯冠軍獎盃落喺巴黎聖日耳門(PSG)手上，2025年嘅金球獎亦呼之欲出，法國前鋒奧士文尼迪比利被視為得獎頂頭大熱門，教練安歷基亦豪言金球獎「非佢莫屬」！

28歲嘅奧士文尼迪比利出道已受注目，喺多蒙特成名即高價轉會巴塞隆拿，可惜發展每況愈下，2年前加盟PSG後重生，今季喺基利安麥巴比離隊後擔大旗，各項賽事攻入33球，帶領PSG成為歐聯、法甲、法足盃「3冠王」，個人數據同團隊成績都非常優秀。

PSG教練安歷基賽後表示：「只係睇奧士文尼迪比利喺決賽點樣防守，已經要頒金球獎畀佢！佢喺今場決賽對防守嘅貢獻，就值得拎金球獎。奧士文尼迪比利示範點樣用入波、冠軍、領導力、防守、逼搶去帶領球隊......佢係我心目中嘅金球獎，無庸置疑。」

根據博彩公司BETVICTOR嘅賠率，奧士文尼迪比利被視為1.5倍大熱，拉明耶馬係3.75倍次熱，之後分別係穆罕默德沙拿(9倍)、基華拉斯基利亞(13倍)同拉芬夏比洛尼(21倍)。