Football

 

兩大「靚佬」碧咸+湯告魯斯好腳頭 入場撐PSG即捧盃

巴黎聖日耳門(PSG)出名多巨星球迷,兩大「靚佬」碧咸、湯告魯斯一齊入場睇歐聯決賽,為呢支法甲豪門打氣,果然好腳頭,見證PSG歷史性首次成為歐聯冠軍。

英格蘭「萬人迷」碧咸球員生涯最後一站效力PSG,今仗決賽當然要支持呢支前度球隊,仲帶埋荷里活明星老友湯告魯斯一齊捧場,兩人坐喺私人包廂欣賞大戰。

PSG贏波之後,碧咸表現非常興奮,不忘同現場球迷大合照,並放上社交網話:「創造歷史上,恭喜PSG,好一場精彩比賽。」值得一提,碧咸踢過AC米蘭,唔少A米球迷抽水,大讚「咸哥」氣勢強勁,即使坐觀眾席,都可以隔空擊敗昔日對手國際米蘭。

至於湯告魯斯現身球場亦大受歡迎,正好可以趁今次機會,向世界為佢套新戲做宣傳。