最大贏家！「K先生」一季奪四冠

巴黎聖日耳門(PSG)捧歐聯冠軍，成為三冠王，入波功臣之一嘅翼鋒「K先生」基華拉斯基利亞仲犀利，變身「四冠王」，因為佢1月由拿玻里轉投PSG之後，仍然有資格獲得意甲獎牌，成為最大贏家。

基華拉斯基利亞今季上半季為拿玻里上陣17場聯賽入5球，其後不惜以罷操威脅，要求轉投PSG，最終以7,000萬歐元(約6.2億港元)轉會費完成交易。呢位24歲格魯吉亞國腳大踢身價波，為PSG各項賽事上陣25場入7球及5次助攻，包括歐聯入3球及2次助攻，PSG由歐聯「聯賽階段」幾乎出局，到踏入淘汰賽後，愈戰愈勇，基華拉斯基利亞發揮關鍵作用。

賽後基華拉斯基利亞話：「夢想成真，無法形容呢種瘋狂情緒，我為自己身為格魯吉亞人感到驕傲，祖國嘅同胞都會覺得開心，我1月加盟PSG，依家奪得歐聯冠軍，證明決定正確。」PSG有份參加世冠盃，基華拉斯基利有望再增添冠軍獎牌。