曼聯與狼隊達成協議　馬菲奧斯根夏加盟

曼聯官方公布，已經成功與狼隊達成協議，前鋒馬菲奧斯根夏將會加盟。

紅魔鬼收購馬菲奧斯根夏已醞釀一段時間，呢位26歲巴西國腳上周向2位狼隊同胞隊友贈送名錶，作為道別禮物，但佢嘅簽約仍需獲得簽證同工作許可先至落實。

早前有消息指，馬菲奧斯根夏轉會費為6,250萬鎊(約6.6億港元)，但兩間球會就付款年期談判拉鋸，曼聯原本打算分期5年支付，但遭狼隊拒絕，最終紅魔鬼作出妥協，於2年內分3期畀晒所有轉會費。

馬菲奧斯根夏2023年1月被馬體會外借去狼隊，半年後被狼隊買斷，佢今季英超上陣33場射入15球及6次助攻，獲多間大球會垂青，最終曼聯捷足先登。