曼城將同洛迪續約　高普前副手強勢加盟

曼城今季「四大皆空」，領隊哥迪奧拿急不及待為下季組軍做準備，力爭捲土重來，根據英國《鏡報》爆料，「藍月亮」將同中場洛迪卡斯簡迪續約至2029年，並邀請高普執教利物浦時期嘅副手連達斯加盟。

洛迪卡斯簡迪上年9月因為膝部十字韌帶受傷長抖，直至上月底先至復出，會方仍然對呢位即將29歲西班牙國腳投下信心一票，就算佢仲有2年合約，都要提早同佢續約至2029年，並會大幅加50%人工，由現時20萬鎊周薪提升至30萬鎊(約317萬港元)，成為隊內第2高薪球員，僅次於艾寧夏蘭特。

另外，哥迪奧拿亦改組教練團隊，邀請連達斯加盟，呢位42歲荷蘭人已同意入「城」。連達斯早於2014年已經加入利物浦教練團，其後成為高普副手，雖然曾於2018年離隊，執教奈梅亨，但僅半年就重返紅軍，直至上年5月同高普一齊走人。

連達斯今季曾執教薩爾斯堡，但半季就被炒，依家又重返英超，卻加入昔日勁敵曼城陣營。