一項分歧　般費加盟希拉爾有阻滯

盛傳曼聯隊長般奴費南迪斯好可能轉投沙特阿拉伯豪門希拉爾，根據沙特傳媒最新消息，希拉爾向佢開出一份2,500萬歐元(約2.2億港元)年薪嘅4年合約，但呢位30歲葡萄牙國腳只願意簽約3年，並要求獲得3,000萬歐元(約2.7億港元)年薪，令轉會出現阻滯。

據悉曼聯已經為般奴費南迪斯離隊開綠燈，只要佢願意轉投希拉爾，會方並唔會阻止，早前傳出希拉爾計劃以超過1億歐元(約8.9億港元)收購般費，對於財政欠佳嘅紅魔鬼而言，絕對係一場及時雨，自然希望交易成事。般費嘅經理人賓奴上周已現身沙特，疑似同希拉爾管理層展開合約談判。

雙方對於合約年期及薪酬存在分歧，希拉爾開出稅後薪酬總值1億歐元嘅4年合約，換言之平均年薪為2,500萬歐元，但般奴費南迪斯認為合約年期太長，只肯簽3年，並要求3,000萬歐元年薪，可見佢無意留喺沙特「養老」，希望3年後重返歐洲聯賽。

由於希拉爾渴望盡快簽入般奴費南迪斯，出戰即將展開嘅世冠盃，預料好大機會接受佢提出嘅要求。