利物浦防線又有人走　基利靴轉投賓福特

繼阿歷山大阿諾特早前轉投皇馬之後，利物浦又有防線球員即將離隊，根據「轉會權威」記者羅曼諾(Fabrizio Romano)爆料，紅軍副選門將基利靴已同意轉投另1支英超球隊賓福特，轉會費為1,800萬鎊(約1.9億港元)。

基利靴出身於利物浦青年軍，2019年成為一隊球員，由於艾利臣比加穩坐紅軍正選門將之位，令呢位26歲愛爾蘭國腳難有上位機會，其中今季各項賽事僅20次披甲，包括10次英超上陣，所以希望離隊尋找新出路。

基利靴只剩下1年合約，利物浦為免明年人財兩失，決定提早出售佢，賓福特出手接貨，簽入基利靴，頂替即將轉投利華古遜嘅門將菲利根。

利物浦上年夏天已向華倫西亞「預訂」門將馬馬達舒維利，呢位24歲格魯吉亞國腳將於今夏正式加盟紅軍，即使基利靴離隊，領隊施洛仍然有充裕門將選擇。