捧歐霸都冇用　熱刺即將炒普帥

熱刺奪得今屆歐霸盃冠軍，但由於英超成績太差，仍然準備換帥，根據「轉會權威」記者羅曼諾(Fabrizio Romano)爆料，熱刺老闆利維將於未來幾日內，決定領隊普斯迪高路前途，好大機會解僱呢位59歲澳洲名帥，下個月冇得嚟香港。

普斯迪高路2年前開始執教熱刺，雖然上季英超獲得第5位，但今季僅排17位，剛剛位處降班線之上，即使佢領軍捧歐霸盃冠軍，為球隊打破17年錦標荒，但班主利維並未滿意，早已經打算向普帥開刀，並且就快落實換帥。

普斯迪高路懶理即將被炒傳聞，暗示可以帶領球隊再創高峰：「我唔想只沉醉於奪冠喜悅之中，而係想為球隊未來做好規劃，諗清楚下一步點行，我哋已經嘗到捧盃滋味，但要確保下次可以再奪冠。」

普斯迪高路同熱刺仲有2年合約，但普遍輿論認為佢難以留任，據悉利維已經有新帥人選，包括賓福特領隊法蘭克、富咸領隊馬高施華。