會唔會太輕敵？英格蘭拉大隊睇F1

英格蘭將於周日(8日)凌晨出戰世界盃外圍賽對安道爾，領隊杜曹唔急於展開操練，先拉大隊去睇F1西班牙站賽事，畀剛經歷緊湊球季嘅國腳們輕鬆一下，果然夠晒體貼。

由於英格蘭對安道爾一戰，安排喺西甲球隊愛斯賓奴主場舉行，「三獅兵團」周日(1日)已經飛赴西班牙集訓，順道欣賞一級方程式賽事。各位球星大駕光臨，搶咗唔少車手風頭，並獲得賽會熱情招待，包括參觀紅牛等車隊備戰情況，仲同一級方程式賽車集團首席執行官Stefano Domenicali見面。

「三獅兵團」睇完F1比賽事後，移師鄰近巴塞隆拿嘅希羅納地區，展開訓練。值得一提，因傷缺陣超3個月嘅曼城中堅史東斯，獲准跟隨英格蘭大軍進行恢復性訓練，佢並唔會為球隊比賽，盛傳史東斯可能今夏離開曼城，重投愛華頓。

英格蘭踢完對安道爾嘅世盃外之後，將於6月11日凌晨主場同塞內加爾踢熱身賽。