阿沙比拒絕意大利徵召　佢咁解釋

國際米蘭喺歐聯決賽以0比5慘敗於巴黎聖日耳門腳下之後，中堅法蘭斯高阿沙比突然宣布拒絕意大利徵召，但呢位37歲老將否認今次決定同歐聯輸波有關，而係由於唔受意大利主帥史巴列堤重用，所以乾脆退出國家隊。

當外界以為法蘭斯高阿沙比受到歐聯慘敗打擊，導致無心戀戰，佢透過社交網澄清話：「經過深思熟慮後，我已通知國家隊主帥，唔會接受徵召，因為經過一連串事件，我覺得自己唔受尊重，唔屬於球隊計劃之內，我一向全力以赴，但如果球隊唔需要我，我絕對唔會留戀，今次決定同歐聯決賽無關，我會繼續支持國家隊取得成功。」

法蘭斯高阿沙比總共為意大利上陣34場入1球，有份協助球隊奪得2021年歐國盃冠軍，史巴列堤成為意軍主帥後，推行年輕化，已年屆退役年齡嘅阿沙比難免受冷落，令佢心灰意冷。

另1位意大利中堅布安基奧奴因傷退隊，史巴列堤已補選費倫天拿後衞盧卡雲尼亞里，亦係呢位26歲守將首次入選。意大利將於6月7日凌晨出戰世界盃外圍賽作客挪威，3日之後主場對摩爾多瓦。