皇馬尋找卻奧斯接班人　睇中史迪拿

今季四大皆空嘅皇家馬德里今夏積極增兵，包括物色卻奧斯接班人，睇中史特加中場24歲防中安祖路史迪拿，史特加開價5,000萬歐元(約4.45億港元)。

西班牙傳媒報道，皇馬簽入阿歷山大阿諾特同甸恩胡積臣後，希望再簽一名中場，解決卻奧斯離隊後防中空缺，「銀河艦隊」在卻奧斯掛靴後，防中位置成為致命弱點，今季四大皆空與此不無關係，因此今夏決心尋找合適防中，解決問題。

獲皇馬睇中嘅史迪拿在拜仁慕尼黑青訓出身，但升上一隊後僅上陣3場，之後踢過賀芬咸，前季加盟史特加至今，兩季上陣80場入5球，上季為史特加獲得德甲亞軍，今季協助球隊奪得德國盃冠軍。

史特加同史迪拿尚餘3年約，合約中3,600萬歐元解約條款要到2026年才觸發，而且史特加只要在到期前向史迪拿支付200萬歐元，解約金條款就會失效，現時史特加對於史迪拿叫價不低於5,000萬歐元，皇馬想簽入史迪拿，就要同史特加談判。

皇馬新帥沙比阿朗素對於來自德甲嘅史迪拿自然相當熟悉，而原來史迪拿嘅經理人公司，亦曾經主理過卻奧斯事務，甚至卻奧斯掛靴後亦已加入該間經理人公司，所以喺卻奧斯推動下，皇馬簽入史迪拿機會唔低。