曼聯打造「鬍鋒」組合　麥比奧莫同意加盟

曼聯經歷球會史上英超最差球季後，重建工作火速進行，繼日子簽入巴西國腳馬菲奧斯根夏後，多個權威媒體周二(3日)爆料，賓福特翼鋒麥比奧莫亦已答應加盟曼聯，兩間球會即時展開斟介，預計轉會費達5,000萬鎊。麥比奧莫同根夏呢對「鬍鋒」組合將令曼聯火力全面升呢。

雖然新球季緣盡歐洲賽，但曼聯呢個「金漆招牌」仍具號召力，兩大轉會權威羅曼諾同Ornstein報道，受到紐卡素、阿仙奴、熱刺垂青嘅喀麥隆球星麥比奧莫，已決定優先加盟曼聯。曼聯得到「綠燈」訊號後，即同賓福特展開斟介，賓福特早已預期麥比奧莫夏天離隊，叫價約5,000萬鎊。

25歲嘅麥比奧莫可踢右翼同前鋒，啱啱嗰季英超就以翼鋒身份拎到20個入球，僅次於穆罕默德沙拿、阿歷山大伊沙克同艾寧夏蘭特3大神鋒；曼聯日前宣布用6,250萬鎊簽入狼隊前鋒根夏，佢今季英超亦有15個入波，兩人熟悉英超可以「即插即用」。麥比奧莫同根夏都擁有Icon「大鬍鬚」，下季呢對「鬍鋒」組合令人期待。