重踏哥哥成名路　祖比比寧咸將投多蒙特

英格蘭國腳祖迪比寧咸，21歲就成為世界頂級球星，佢喺5年前由英冠轉戰德甲多蒙特，成為「上位」嘅起點。祖迪比寧咸細佬祖比比寧咸，今季啱啱協助新特蘭升上英超，但就決定重踏哥哥嘅成名路，據報19歲嘅佢已決定加盟多蒙特，轉會費約2,500萬鎊。

據英國同德國媒體報道，多蒙特已開出2,100萬鎊轉會費，連同獎金條款總值達2,500萬鎊，力斟祖比比寧咸加盟。另一德甲球會法蘭克福亦同意開出相同收購條款，不過祖比比寧咸就屬意去多蒙特，而且仲要盡快完成轉會，希望代表多蒙特出戰即將展開嘅世冠盃。

比寧咸兄弟感情要好，上星期被影到一齊喺西班牙伊維薩島度假，如果祖比比寧咸順利加盟多蒙特踢世冠盃，加上哥哥亦會代表皇家馬德里出戰，兩兄弟就有望喺世冠盃較後階段正面交鋒。