水晶宮面臨褫奪歐戰資格　急飛瑞士辯護

今季勇奪英足盃冠軍嘅水晶宮，幾經辛苦拎到下季歐霸盃參賽資格，不過因為班主違反「多重球會擁有條例」，面臨被褫奪參賽資格。據報水晶宮嘅律師團隊已緊急飛去歐洲足協嘅瑞士總部，就呢件事進行辯護，希望可以獲歐洲足協放生。

水晶宮嘅大股東係美國商人泰斯達，佢擁有球會45%股份，但佢同時亦係法甲球會里昂大股東，里昂下季同樣會踢歐霸盃。根據歐洲足協「多重球會擁有條例」，兩間有相同擁有者嘅球會，係唔可以參加同一賽事。其中一個比較慣常做法，係水晶宮「降格」踢歐協聯，但泰斯達另一擁有球會邦比，亦會以丹麥聯賽第3名身份出戰，所以「此路不通」。

歐洲足協條例規定，如果出現呢種情況，參賽資格會畀聯賽排名較高球會，只排英超12位嘅水晶宮明顯「輸晒」，如果水晶宮真係被褫奪歐戰資格，佢個席位就會由英超第8名嘅白禮頓補上。水晶宮律師團，正向歐洲足協財務管控部(CFCB)進行游說，其中一個重點，係泰斯達雖然係球會大股東，但喺決策上，同另外3名股東係各有1個投票權，實際上只有25%決定權。