歐國聯「4強決賽周」　新星騷身價

今屆歐國聯「4強決賽周」將於周四(5日)凌晨揭幕，東道主德國、上屆冠軍西班牙、葡萄牙、法國展開衝冠大作戰，4大傳統勁旅球星如雲，仲有唔少新星蓄勢待發爭上位，各大豪門亦睇到實，準備出手搶人才。

法國新核首度登場

法國向來盛產天才球星，由施丹、亨利到基利安麥巴比，都係「頂流」。今屆歐國聯4強，領隊迪甘斯就喺千呼萬喚下，召21歲中場卓基入伍，佢嘅演出令球迷非常期待。

卓基依家只係得21歲，但其實佢6年前已經嶄露頭角，啱啱16歲就為里昂一隊上陣，而且好快成為球隊主力。卓基嘅創造力令佢成為里昂進攻核心，近3季平均每季踢超過40場，24/25球季更有12個入波，表現非常成熟。卓基「上位」多年都未入法國國家隊，一度引嚟意大利、阿爾及利亞足總挖角，今次迪甘斯終於搵佢入伍，令法國球迷放下心頭大石。

卓基今夏有望入城

卓基同里昂合約有2,000萬鎊買斷條款，佢之前宣布夏天將會離隊，英超勁旅曼城已展開斟介，據報哥迪奧拿視佢為奇雲迪布尼接班人。若果卓基協助法國贏歐國聯冠軍，加上轉會豪門嘅聲勢，勢必成為球壇炙手可熱嘅超級新星。

德國兩米美斯頭腳都掂

對於禾達美迪嚟講，今個6月非常充實，除咗首度入選德國隊，打完歐國聯之後，佢要立刻返回德國U21參加U21歐國盃，忙到甩轆。

禾達美迪獲拜仁垂青

禾達美迪今季加盟史特加，原本定位只係後備前鋒，點知佢愈踢愈順，由R1變坐正，各項賽事有17粒進帳，兼贏埋德盃冠軍。禾達美迪既有傳統中鋒嘅一流頂上功夫，但絕對唔笨重，轉身快同速度都有番咁上下，腳法亦唔曳，能夠頂住後衞分波，甚至直接轉身擺脫對手，更被傳媒吹捧為「兩米美斯」。

雖然德國冇再玩無鋒陣，近年都有夏維斯、富克洛、基連甸斯特等前鋒，但佢哋唔係入球率飄忽，就係太粗枝大葉，禾達美迪踢法咁全面，真係可遇不可求，據報拜仁慕尼黑想買佢做哈利卡尼後備，如果喺歐國聯打出名堂，隨時成為豪門搶手貨。

鬥牛新利角一柱擎天

西班牙鋒線雙翼拉明耶馬、尼高拉斯威廉斯演出獨當一面，但一直缺少中鋒，仍要靠老將艾華路莫拉達支撐大局，成為球隊一大軟肋，幸好隨住奧摩洛迪安嶄露頭角，局面有望改變。

奧摩洛迪安出身於CF格蘭納達青訓系統，曾效力馬體會，但苦無上陣機會，直至上年夏天轉投波圖，終於有發揮舞台，今季各項賽事上陣42場入25球及3次助攻，上年11月首次晉身大國腳。

奧摩洛迪安獲巴塞吼賽

身高1米93嘅奧摩洛迪安擁有尼日利亞血統，身材高大、強壯，並且速度快，屬於典型9號中鋒，可增添西班牙戰術變化，難怪被譽為「鬥牛兵團」最需要嘅一隻利角。據悉巴塞隆拿已經睇中奧摩洛迪安，希望簽入佢做羅拔利雲度夫斯基嘅接班人。

葡軍萬能Key有巨星傍住

波圖青訓出身嘅洛迪高摩拉去年夏天獲提拔上一隊，立即展現驚人天賦，在隊中可擔任進攻中場及左右翼鋒，屬於全能型進攻球員，首季23場聯賽交出10入球4助攻，已經進入歐洲各大豪門視線，巴黎聖日耳門（PSG）及曼聯都有派員深入考察，身價估計上升至4,000萬歐元（約3.56億港元）。

洛迪高摩拉被封「新時代標誌」

今期歐國聯點兵，洛迪高摩拉獲葡萄牙主帥馬天尼斯徵召，更獲點名大讚為「新時代標誌」，勢必成為眾人焦點；呢位全能型進攻球員將會與C朗拿度及般奴費南迪斯等巨星做隊友，仲可以喺一眾師兄身邊近距離學習成長，準備喺今期國際賽事處子戰力爭上位。