華迪斯「投軍」遇阻　利華古遜要求「贈送」兩人

利物浦收購利華古遜中場科利安華迪斯，遇到阻滯，根據英國《每日郵報》爆料，紅軍近日開出1.09億鎊(約11.6億港元)收購呢位22歲德國國腳，但利華古遜方面仍然唔滿意，要求利物浦「贈送」哈維艾利洛、查洛爾昆沙作為交易條件，簡直係獅子開大口，導致談判陷入僵局。

科利安華迪斯成為今夏轉會市場最炙手可熱人物，曼城、拜仁慕尼黑、利物浦都力爭簽入佢，呢位天才新星只想加盟紅軍，甚至已同呢支英超冠軍達成個人待遇條款，問題係佢仲有2年合約在身，利華古遜想吊高來賣。

據悉利物浦首次報價開出1.09億鎊，已被利華古遜拒絕，呢支德甲勁旅要求起碼1.26億鎊(約13.4億港元)，新教練坦哈格現時又有新建議，希望獲得利物浦中堅查洛爾昆沙、中場哈維艾利洛，以保持實力，如果紅軍想簽入科利安華迪斯，恐怕需要「犧牲」呢兩位同樣22歲嘅後起之秀。

由於查洛爾昆沙、哈維艾利洛並非利物浦主力，加上兩人想獲得更多上陣時間，轉投利華古遜都係一條出路，唔排除利物浦會「割愛」，答應坦哈格要求。