歐聯4天王返葡萄牙　祖奧尼維斯唔識攰

巴黎聖日耳門(PSG)日前喺歐聯歷史性封王，隊中「葡萄牙幫」功勞極大，域天拿、祖奧尼維斯、紐奴文迪斯同干卡路拉莫斯都有喺決賽上陣，佢哋慶祝完之後，又要即刻飛去葡萄牙國家隊報到，準備對德國嘅歐國聯4強大戰，完全唔知個「攰」字點寫！

歐洲足協公布嘅歐聯最佳11人，中場域天拿同左閘紐奴文迪斯都成功入選，而域天拿同祖奧尼維斯嘅中場組合，更加被視為歐洲最佳。統計顯示，祖奧尼維斯今屆歐聯跑動184.3公里，域天拿跑動180.2公里，排歐聯第1同第2位，係球隊嘅動力來源。

有兩位「氣袋」坐鎮，絕對係葡萄牙同巴黎聖日耳門嘅福氣。據報「歐聯4子」已向葡萄牙報到，祖奧尼維斯就表示唔介意冇得抖：「當我哋參加呢啲大型比賽，嚟到呢個水平，疲倦已經唔係一回事，我哋唔知咩係『攰』，只係專注贏多2場波捧走歐國聯，我哋擁有所有成為『最好』嘅條件。」