彈鐘再彈鐘　「新C朗」將被送返賓菲加

葡萄牙前鋒祖奧菲歷斯外借AC米蘭期滿，已被送返車路士，據報車路士並唔打算留用該位25歲攻擊球員，將以借或賣方式將佢送返母會賓菲加。

祖奧菲歷斯出道初期被譽為「新C朗」，2019年以1.13億鎊由賓菲加轉投馬德里體育會，初時都算正常，但之後愈踢愈差，期間先後外借到車路士及巴塞隆拿，但都被「退貨」。

上季車路士以4,300萬鎊向馬體會簽佢返嚟，仲簽咗7年長約，不過同時間車路士亦以相若價錢將干拿加歷查賣畀馬體會，雙方可能藉此「做靚盤數」，買入祖奧菲歷斯並非重要收購。

果然祖奧菲歷斯在車路士主帥馬利斯卡麾下未獲重用，半季之後即被外借到AC米蘭，不過借用期滿後再被「退貨」。

葡萄牙傳媒報道，祖奧菲歷斯母會賓菲加打算伸出緩手，同車路士斟介借用或買斷方式回購球員，並火速進行，期望趕及世冠盃開賽前完成轉會，讓祖奧菲歷斯出戰世冠盃。