米祖域將重返歐洲　曼聯機會來了

2023年夏天轉戰沙職嘅塞爾維亞前鋒阿歷山大米祖域，據報將於今夏重返歐洲落班，吸引多支英超球隊注視，包括曼聯，紅魔鬼剛錯失簽入利安戴納，呢位中鋒值得考慮。

30歲嘅米祖域兩年前由富咸轉投希拉爾，轉會費5,000萬歐元，兩年上陣79場射入68球，今夏希拉爾打算簽新外援，米祖域雖然仲有1年約，但如果有新援加盟，希拉爾就會放人，而米祖域如果離隊就希望重返英超搵食。

米祖域現時年薪高達2,500萬歐元(約2.22億港元)，化為周薪將超過40萬鎊，屬於英超頂薪，不過如果順利回歸英超，米祖域願意減薪。

希拉爾對米祖域轉會費叫價4,000萬歐元(約3.56億港元)，英國傳媒報道，雖然富咸無意回購呢位箭頭，但愛華頓、韋斯咸，以及曼聯都對佢有興趣，其中曼聯被利安戴納拒絕後，正物色新中鋒人選，米祖域係唔錯選擇。