沙特政府介入C朗談判　豪華計劃曝光續約好事近

葡萄牙球星C朗拿度將揭開沙特「新篇章」！早前暗示要結束艾納斯生涯嘅C朗，據報好大機會繼續留喺沙特發展，當中關鍵係沙特政府主動介入，承諾巨額投資畀C朗效力嘅PIF球隊，以及賦予轉會話事特權。消息指C朗基本上已同意續約艾納斯，並考慮以短期外借身份為希拉爾出戰世冠盃。

C朗同艾納斯合約喺今個月底完結，早前沙職煞科戰後，C朗以「這一篇章完結」暗示即將轉會。據《CBS》報道，沙特政府認為失去C朗，對國家近年大力打造嘅體育事業係重大打擊，所以官員直接介入續約談判，由沙特主權財富基金(PIF)控制嘅艾納斯、希拉爾同吉達艾阿里都向佢開出合約，目標係將C朗留喺沙特。

報道指沙特政府為留低C朗，已承諾會撥出巨額資金畀C朗選擇效力嘅PIF球會，而且C朗會喺轉會等決策上有話事權。法國著名記者Aouna周三(4日)爆料，指C朗同艾納斯已就續約達成共識，嚟緊會簽左翼、防中同中堅，其中左翼目標係利物浦嘅迪易斯迪亞斯，艾納斯將開價8,500萬歐元收購；中堅目標就睇中皇馬嘅魯迪格。

另外，為滿足C朗嘅野心，沙特政府亦提出C朗續約艾納斯後，特許以借用身份短暫效力另一PIF球會希拉爾，代表佢哋出戰月中展開嘅世冠盃，不過C朗仍未作出回應，佢亦擔心如果效力希拉爾，會影響佢喺艾納斯球迷心目中嘅地位。