【官宣】龍門執位！基利靴去賓福特　菲利根投利華

夏天轉會市場開動，周三(4日)就有龍門大執位，賓福特官方宣布簽入利物浦嘅基利靴，代替過檔利華古遜嘅菲利根，各取所需。

26歲嘅基利靴係利物浦青訓產品，作為北愛爾蘭國腳嘅佢近年做「盃賽門將」，已經顯示出正選嘅實力，可惜喺利物浦搶唔到艾利臣比加個正選，隨住馬馬達舒維利今夏歸隊，基利靴更加「可有可無」，最終以1,250萬鎊轉會費，外加550萬鎊獎金條款賣去賓福特。基利靴簽約後表示：「離開利物浦嘅決定並唔困難，我認為係時候要去一間可以畀我做長期正選嘅球會，當聽到賓福特想簽我，我就希望盡快實現。」

賓福特簽入基利靴後，同時宣布荷蘭門將菲利根轉投利華古遜，轉會費約800萬鎊，亦係坦哈格執教利華古遜首簽。賓福特總監基爾斯表示：「當菲利根收到利華嘅聘約，我哋第1時間就考慮基利靴，佢除咗係個好龍門，性格仲得到所有人嘅好評，我好有信心基利靴會喺賓福特取得成功。」