般費真情剖白留隊原因：曼聯唔等錢使！

曼聯隊長般奴費南迪斯，日前正式拒絕沙特豪門希拉爾斟介，繼續留效「紅魔鬼」。般費喺葡萄牙國家隊出席記者會期間，真情剖白作出呢個選擇嘅原因，表明老婆全力支持佢「事業為重」嘅決定，更直指曼聯「唔等錢使」，歡迎佢繼續留隊。

據報如果般費轉會希拉爾，曼聯將獲1億歐元(約9億港元)轉會費，對於下季冇得踢歐洲賽嘅佢哋嚟講，係筆重要收入，不過般費喺記者會表示：「我確實有機會轉會，希拉爾會長一個月前搵過我，我考慮過一段時間，如果曼聯覺得賣走我係好事，我對轉會持開放態度。我同艾摩廉傾過，佢極力挽留我；我同球會傾，球會話除非我好想走，否則都唔想賣走我，佢哋唔等呢筆錢使。」

最終留隊決定，般費就話係以事業為重：「轉會對我嚟講好容易，我兩個老友魯賓尼維斯同祖奧簡斯路都喺沙特，但我想留喺最高水平賽事、踢最好嘅比賽，我覺得自己仲有能力。我問老婆，佢都同意我將事業放喺第1位，我對體育仍然好有熱誠，好開心自己做出呢個決定。」