巴高拿失寵想離PSG　曼城、車路士搶人

巴黎聖日耳門(PSG)勇奪歐聯冠軍，「三叉戟」基華拉斯基利亞、迪斯亞杜伊同奧士文尼迪比利無堅不摧，不過冇幾耐之前仲係「天之驕子」嘅巴特利巴高拿，依家就連正選位置都冇埋，據報呢位法國新星有意離隊，曼城同車路士等英超球會都準備搶人。

22歲嘅巴高拿今季表現出色，各項賽事有21個入波同19次助攻，但自從冬天簽入基華拉斯基利亞，加上迪斯亞杜伊大爆發，巴高拿就失去正選位置。法國媒體報道，巴高拿代表近日同PSG高層會面商討前途，PSG當然唔想賣走佢，仲打算開新約挽留，但巴高拿就擔心長遠發展會受到阻礙，尤其明年係「世盃年」，做後備會影響佢入法國隊嘅機會。

英國傳媒報道，曼城視巴高拿為基亞利殊嘅最佳代替人選，而車路士亦想將佢收歸旗下，消息指轉會費「起步價」為1億歐元，而阿仙奴同熱刺亦準備加入戰團，爭逐將會非常激烈。