金球獎之戰！耶馬挑戰迪比利最後機會？

歐國聯4強法國對西班牙之戰，被視為2025年「金球獎」前哨戰。啱啱帶領巴黎聖日耳門贏歐聯冠軍嘅奧士文尼迪比利，被公認為金球獎大熱門，不過西班牙新星拉明耶馬亦有唔少支持者，如果呢位巴塞隆拿球星可以幫西班牙贏歐國聯冠軍，或者可以搶番唔少分數！

金球獎除咗睇個人表現之外，一向要有「實績」支持，奧士文尼迪比利拎到歐聯、法甲同法足盃，自然係頂頭大熱；拉明耶馬亦帶領巴塞贏西甲同西盃冠軍，如果贏埋歐國聯冠軍，絕對有機會同奧士文尼迪比利「拗手瓜」。

對於呢場金球之戰，拉明耶馬賽前就先「降溫」：「每個人有自己睇法，我希望可以擊敗法國，但我唔覺得呢場會決定金球獎。如果今場發展唔係我或者迪比利預期，咁係咪投畀其他球員？我認為投票係投畀全年表現最好嘅人，而唔係一場定勝負。」