基亞利殊將無緣世冠盃　離隊已成定局

根據英國各大傳媒報道，曼城領隊哥迪奧拿唔會揀選中場基亞利殊，出戰即將展開嘅世冠盃賽事，畀佢有足夠時間「搵工」，意味呢位29歲英格蘭球星離隊已成定局。

曼城4年前豪花1億鎊(約10.6億港元)向阿士東維拉收購基亞利殊，但佢一直未能踢出身價，並且表現每況愈下，今季更加經常受傷缺陣，只有8場可以踢足90分鐘。

據悉哥迪奧拿已經對基亞利殊失去耐性，決定今夏出售佢，估計只要有球會出到4,000萬鎊(約4.25億港元)就可以帶走呢位「一億先生」。早前有傳意甲冠軍拿玻里打算一次過簽入兩位曼城「棄將」奇雲迪布尼、基亞利殊，佢哋隨時可能一齊登陸意甲。

與此同時，曼城搶奪意甲球員，根據「轉會權威」記者羅曼諾(Fabrizio Romano)爆料，「藍月亮」已經同AC米蘭達成協議，以5,700萬歐元(約5.1億港元)固定轉會費收購A米中場雷恩達斯，如果呢位26歲荷蘭國腳表現達標，轉會費可增加至7,000萬歐元(約6.27億港元)，哥迪奧拿希望盡快完成交易，帶埋雷恩達斯踢世冠盃。