艾摩廉下達「逐客令」：海倫必須走

繼阿歷真度加拿祖之後，另1位曼聯鋒線球員海倫，亦遭領隊魯賓艾摩廉列入「清洗名單」，根據《Give Me Sport》報道，艾摩廉已經告知球會管理層，下季鋒線並冇海倫嘅位置，要求出售呢位22歲丹麥國腳。

海倫2年前以身價達7,200萬鎊(約7.7億港元)轉會費，由阿特蘭大加盟曼聯，首季英超上陣30場入10球，已被批評表現遠低於身價，今季仲離譜，踢32場聯賽僅入4球，證明佢根本唔適合踢英超。由於紅魔鬼已簽入狼隊前鋒馬菲奧斯根夏，並即將收購賓福特翼鋒麥比奧莫，即使海倫留隊，亦難有上陣機會，魯賓艾摩廉認為應該將佢同阿歷真度加拿祖一齊出售，騰出資金建立一套更佳陣容。

由於海倫成「魔」後表現太差，難以原價7,200萬鎊出售，會方為免虧損太多，可能先將佢外借，希望好似安東尼馬菲奧斯外借去貝迪斯後，演出重生，從而提升售價。近期傳出國際米蘭有意簽入海倫，可能成為佢最佳落腳地。