一季貨仔　基艾沙同意加盟AC米蘭

利物浦翼鋒費達歷高基艾沙登陸英超1季就玩完，據悉呢位27歲意大利國腳已經決定離隊，並同AC米蘭達成口頭加盟協議，只要兩間球會傾掂轉會費，就可以完成交易。

費達歷高基艾沙上年夏天由祖雲達斯轉投利物浦，由於受傷及狀態欠佳，僅上陣14場射入2球及2次助攻，對於球隊貢獻非常有限，加上紅軍鋒線位置競爭激烈，即使基艾沙留隊，下季亦難有發揮機會，轉會成為佢拯救事業最佳方法。

費達歷高基艾沙首選都係重返意甲，適逢AC米蘭需要增兵提升成績，所以向呢位「星二代」埋手，雙方一拍即合，現時只等利物浦開綠燈。由於紅軍上年僅用1,200萬歐元(約1億港元)買入費達歷高基艾沙，加上佢表現唔對辦，難以嗌高價，估計只要收回成本價，就會放人。