華迪斯喪踢曼聯隊長 利迷狂讚好波
利物浦今夏重磅收購目標科利安華迪斯仍未傾妥轉會，但其表現已深獲利迷認同，事關尋晚歐國聯德國對葡萄牙，呢位22歲利華古遜進攻中場，喪踢般奴費南迪斯，又力抗貝拿度施華，表現極其彪悍，好多利迷都希望佢盡快加盟。
華迪斯喺呢場大戰攻入1球，由反搶到策劃進攻，入楔靚位頭槌頂入，一氣呵成盡展足球智慧，而佢喪踢般奴費南迪斯同力抗貝拿度施華嘅畫面，亦喺利物浦球迷之間瘋傳，大讚佢係「真正嘅鬥士」。
華迪斯喪踢般奴費南迪斯片段：
利物浦收購華迪斯一事上，已向利華古遜開出兩次報價，但都被拒絕，利華古遜堅持要價1.5億歐元(約13.4億港元)天價，先肯放人，不過經過今場歐國聯大戰，華迪斯展現嘅足球智慧同鬥心，利物浦有可能以破球會紀錄將佢簽下。