安察洛堤首演冇料到　巴西僅3次射門被悶和

「足球王國」巴西上月請到意大利名帥安察洛堤執教，令球迷充滿期等，不過周四(6日)朝早世盃外南美洲區賽事，安察洛堤首度領軍冇料到。擁有豪華鋒線嘅巴西，作客厄瓜多爾全場只係得3次攻門，最終被悶和0比0，繼續排喺第4位。

巴西今場派出雲尼斯奧斯祖利亞、李察利臣同新星艾斯迪華奧攻擊，可惜全隊創造力欠奉，兩次中龍埋門都係靠雲尼斯奧斯個人能力製造，論攻勢更唔及厄瓜多爾嘅6次射門(3次中龍)，最終0比0嘅賽果令巴西球迷失望。

雲尼斯奧斯賽後呼籲球迷畀時間安察洛堤：「我一直都話安察洛堤係我合作過最好嘅教練，能夠喺巴西同佢合作實在太好。安察洛堤仍未有時間去展示佢嘅工作同比賽計劃，只係同大家一齊兩、三課訓練，大家要畀啲耐性。」

至於另一場南美洲區賽事，已出線嘅阿根廷憑祖利安艾華利斯一箭定江山，作客1比0擊敗智利。