阿仙奴又執車仔貨　500萬鎊平簽Kepa

阿仙奴喺今個夏天轉會市場仍未出手，不過已緊密接觸多位目標人物，其中包括車路士門將阿列沙巴拿加。據報呢位西班牙門將，合約內有500萬鎊買斷條款，阿仙奴正接洽呢位世界「最高身價門將」，有意搵佢出任大衞拉耶副手。

現年30歲嘅阿列沙巴拿加，7年前妁7,160萬鎊轉會費加盟車路士，至今仍然係門將最高轉會費紀錄，佢上季被外借去般尼茅夫，31場聯賽有8場保持不失，表現回勇，獲得阿仙奴賞識。著名記者羅曼諾報道：「阿仙奴視阿列沙巴拿加為大衞拉耶嘅後備人選之一，佢合約內有500萬鎊買斷條款，初步接觸已經展開。」

大衞拉耶連續2季榮膺英超「金手套」，上季後備門將尼圖結束借用後，已返回般尼茅夫，所以需要再物色2號門將。阿仙奴近年接收唔少車路士嘅「棄將」，由施治、大衞雷斯、韋利安、佐真奴費路到夏維斯，似乎對車仔球員特別鍾情。