【官宣】熱刺炒普斯迪高路　36歲少帥成接班大熱

熱刺奪得今屆歐霸盃冠軍，打破17年錦標荒，但領隊普斯迪高路仍然冇得留低，會方正式宣布同呢位59歲澳洲名帥解約。根據英國《太陽報》爆料，熱刺新任總監柏拉迪斯「用人唯親」，計劃聘請意大利同胞費利奧利接手執教，呢位36歲少帥今季帶領阿積士「臨尾香」失落荷甲錦標，最終黯然下台，若然熱刺真係由佢擔任主帥，恐怕前景唔樂觀。

普斯迪高路2023年夏天成為熱刺主帥，並實現自己「第二季捧盃」定律，呢支倫敦球隊上月奪得歐霸盃冠軍後，「澳普」曾經表示自己工作仍未完成，希望留隊，相信佢下一步想提升英超成績，但熱刺班主利維並唔打算畀機會普斯迪高路，決定換帥。

雖然會方聲明讚賞普帥成為球隊史上第3位領軍捧歐洲賽冠軍嘅領隊，但亦暗批佢聯賽成績欠佳，包括今季排第17位，成為熱刺史上最差英超成績，為咗球隊利益，需要作出改變。

至於普斯迪高路發表感人告別宣言：「回想執教熱刺2年時間，感到無比自豪，能夠為球隊奪得應有榮譽，令我終生難忘，感謝球迷、球員、工作人員對我嘅支持及鼓勵，我哋永遠在一起。」

近期傳出賓福特領隊法蘭克、富咸領隊馬高施華屬於熱刺新帥熱門人選，但英國《太陽報》指柏拉迪斯今夏回巢擔任總監，將負責聘請新帥工作，佢非常欣賞費利奧利，呢位少帥隨時接掌熱刺帥印。費利奧利僅得4年教波經驗，最近兩份工作，分別執教尼斯、阿積士，都係一季就下台，恐怕佢未夠班坐熱刺帥位。