出師不利　比利時「玩留力」遭逼和

周六(7日)凌晨世界盃外圍賽歐洲區J組爆出冷門，擁有兩大球星盧卡古、奇雲迪布尼助陣嘅比利時首仗出師不利，踢到臨完場前失守，作客被北馬其頓逼和1比1，連1.33倍客W都開唔出，呢支「歐洲紅魔」仍未能擺脫青黃不接頹勢。

比利時原本有不俗開局，上半場28分鐘由左後衞迪古柏入波打開紀錄，並且控制戰局，以為可以輕鬆全取3分，領隊魯迪加西亞先後換走奇雲迪布尼、盧卡古，似乎想留力下周二(10日)凌晨主場對榜首威爾斯。

不過，魯迪加西亞嘅如意算盤打唔響，踢到86分鐘，北馬其頓同樣由左後衞入波，33歲老將阿里奧斯基攻破比利時大門，逼和1比1，呢支巴爾幹球隊3戰取得1勝2和，排J組第2位，表現相當硬淨。

同組另1場，威爾斯憑祖朗頓、哈利威爾遜、基化摩亞各建一功，主場以3比0大勝列支敦士登，3戰取得2勝1和，下場對比利時，將面臨真正考驗。