安全第一　奧尼屈堅斯「輕傷」退隊

英格蘭國家隊傳來不利消息，前鋒奧尼屈堅斯操練期間輕微受傷，為咗安全着想，決定提早退隊，無緣周日(8日)凌晨世界盃外圍賽對安道爾，以及3日之後熱身賽對塞內加爾。

據悉奧尼屈堅斯只係受輕傷，領隊杜曹唔想佢冒險，加上對手只係弱隊安道爾，即使少1位前鋒選擇，亦影響不大，所以批准呢位29歲阿士東維拉射手提早退隊，返回球會接受治療。

奧尼屈堅斯今季為阿士東維拉各項賽事上陣54場射入17球及14次助攻，表現非常出色，備受睇好有能力爭奪「三獅兵團」正選。杜曹執教英格蘭後，奧尼屈堅斯仲未為國家隊披甲，原本想趁今次國際賽觀察佢表現，可惜事與願違。

奧尼屈堅斯退隊之後，英格蘭現時只剩下2位正宗中鋒哈利卡尼、艾雲東尼，但杜曹並冇打算補選球員。