拉舒福特自細捧巴塞　願減薪加盟

由於阿士東維拉錯失歐聯資格，將唔會向曼聯買斷借將拉舒福特，曼聯要為「福仔」尋找新買家，據報呢位27歲球星近日同巴塞隆拿有唔少互動，仲話佢願意減薪加盟，今夏轉投巴塞機會不斷上升。

拉舒福特近日同巴塞隆拿扯上關係，包括網上流傳一幅疑係佢兒時身穿巴塞隆拿波衫嘅相片，據稱幅相拍攝於2006年歐聯決賽前夕，巴塞隆拿對阿仙奴，結果巴塞贏2比1捧盃，而相中人疑似係當時只得9歲嘅拉舒福特，但亦有網友指，呢幅相係AI圖片。

不過除咗幅相，網友亦發現拉舒福特近日同拉明耶馬喺網上互相吹捧，拉舒福特讚耶馬係「年輕王者」，似乎打算同巴塞王牌球星預先打好關係，而耶馬亦為拉舒福特嘅特訓片段點讚作回應。

西班牙傳媒報道，如果加盟巴塞，拉舒福特願意就佢現時嘅32.5萬鎊周薪進行減薪，加上巴塞斟介利物浦翼鋒路易斯迪亞斯觸礁，巴塞簽入「福仔」唔係冇可能，而曼聯開出轉會費為4,000萬鎊(約4.24億港元)。