荷蘭2比0贏芬蘭響頭炮　迪比逼近尹佩斯紀錄

周日(8日)凌晨世盃外歐洲區G組，首度出師嘅荷蘭憑迪比同杜費斯各建一功，作客2比0輕取芬蘭。31歲老將迪比雖然離開歐洲球壇，但仍獲領隊朗奴高文信任，今場入波係佢喺國家隊第48球，仲差2球就追平尹佩斯嘅荷蘭入球紀錄。

荷蘭今場用「利物浦孖寶」加普同謝利美費林邦輔助迪比，開波6分鐘迪比就把握芬蘭回傳失誤，輕鬆射入打開紀錄；23分鐘杜費斯接應加普傳中，近門射成2比0。荷蘭下半場未能把握機會，但芬蘭亦無力反撲，荷蘭順利全取3分。

效力巴甲哥連泰斯嘅迪比，今場射入喺荷蘭第48球，入多2球就可以同尹佩斯(50球)並列荷蘭史上入波最多球員，周三(11日)對魚腩馬爾他，大有機會實現呢個里程碑。至於右閘杜費斯今場入波，係佢喺國家隊第10球，超越華基爾雲迪積克(9球)，成為荷蘭今個世紀入波最多嘅後防。