阿積士免費放走軒達臣　新特蘭機會來了

根據英國《鏡報》爆料，荷甲勁旅阿積士願意畀中場佐敦軒達臣今夏自由身離隊，盛傳呢位即將35歲嘅英格蘭國腳，好大機會重返母會新特蘭。

佐敦軒達臣2023年夏天離開效力咗12年嘅利物浦，轉投沙特阿拉伯球隊伊蒂法克，但僅半年就離隊，上年1月加盟阿積士。佐敦軒達臣今季上陣45場入1球及6次助攻，但阿積士早前換帥，由希汀加接手執教，無意留用周薪達10萬鎊(約106萬港元)嘅軒達臣，加上佢只剩下1年合約，會方已經通知呢位老將今夏可以自由身走人。

新特蘭相隔8年再次取得英超席位，希望邀請佐敦軒達臣回巢，接替好可能離隊嘅祖比比寧咸。事實上，雙方上年12月已經接觸過，加上阿積士現時願意免費放人，好大機會成事。英格蘭上場世盃外對安道爾，佐敦軒達臣擔任正選，可見佢仍然有心有力。