艾納斯爭奪加拿祖　同偶像C朗拍住上

根據「轉會權威」記者羅曼諾(Fabrizio Romano)爆料，曼聯翼鋒阿歷真度加拿祖今夏離隊已定成局，利華古遜及3支英超球隊有意簽入呢位20歲阿根廷國腳。英國《鏡報》指沙特阿拉伯豪門艾納斯亦加入爭奪戰，若然成事，加拿祖可以同偶像C朗並肩作戰，組成「最囂張鋒線」。

曼聯準備出售阿歷真度加拿祖已成為公開嘅秘密，有傳利華古遜、拿玻里、馬體會希望簽入佢，紅魔鬼要求最少5,000萬鎊(約5.3億港元)轉會費，令交易停滯不前。《鏡報》指艾納斯財大氣粗，可以完全滿足曼聯嘅要求，亦會為加拿祖提供高薪合約，加上佢一向視C朗為偶像，成為艾納斯一大有利因素，兩人曾於2022/23年球季一齊效力曼聯。

不過，由於阿歷真度加拿祖仍未穩佔阿根廷國家隊位置，如果佢貿然去沙特「挖金」，可能影響出戰明年世界盃決賽周嘅機會，令佢陷入兩難局面。除咗加拿祖之外，利物浦前鋒路易斯迪亞斯都係艾納斯收購目標，只要C朗留隊，下季應該會有具級數新隊友幫手爭標。