重返成名地　哈利威爾遜想再創歷史

威爾斯喺比拿美執教下表現出色，目前喺世盃外歐洲區J組排榜首，佢哋周二(10日)會作客比利時，射手哈利威爾遜會重返佢成名之地，今次當然希望可以再創歷史。

利物浦青訓出身嘅哈利威爾遜少年得志，16歲已經代表威爾斯上陣，係威爾斯史上最年輕國腳，12年前佢第1次為「紅龍」上陣，就係喺布魯塞爾對比利時，哈利威爾遜表示：「當時比利時有夏薩特同奇雲迪布尼，作為一個細路，能夠同佢哋同場比賽係好神奇。當我後備上陣，真係又緊張又興奮，我已經唔係太記得場上發生咩事，但我上陣嗰陣輸緊0比1，最後係1比1，我覺得我都有功勞。」

上場對列支敦士登入波，已經係哈利威爾遜61場國際賽第13球，亦係近6場國際賽第5次入波，佢喺2021年嘅世盃外亦曾射破比利時大門。自哈利威爾遜首演後，威爾斯同比利時8次交鋒係2勝4和2負，佢賽前表示：「威爾斯近年進步好大，能夠同比利時嘅黃金世代踢到不相伯仲就係證明，我相信我哋可以保持呢個表現。」