「死神」復出　艾朗藍斯或轉戰墨超

有「死神」之稱嘅艾朗藍斯今季季尾忽然由球員變身主帥，擔任卡迪夫城臨時領隊，但球隊最終護級失敗，下季降落英甲。現年34歲嘅艾朗藍斯今夏約滿離隊，但佢並未打算退役，更加可能轉戰墨超，加盟普馬斯。

艾朗藍斯近年因受傷患困擾，坐多過踢，自從3月之後，未再上陣過，但仍然獲得普馬斯垂青。英國《太陽報》引述墨西哥電視台消息，指普馬斯計劃簽入艾朗藍斯，並且好大機會成事。

此外，普馬斯方面有意遊說上月宣布掛靴嘅36歲射手卡路士韋拿復出，呢位前墨西哥國腳曾經同艾朗藍斯喺阿仙奴做過隊友，如果佢肯出山，應該有助吸引艾朗藍斯加盟。