世一左閘！文迪斯幫迪比利「搶」番金球獎

葡萄牙喺歐國聯勇奪冠軍，連續2場入波嘅C朗拿度搶盡風頭，不過要數決賽贏波最大功臣，紐奴文迪斯就當之無愧。呢位「世一左閘」喺決賽凍結拉明耶馬，仲有餘力助攻兼入波，最後當選埋賽事MVP，亦令巴黎聖日耳門(PSG)隊友奧士文尼迪比利贏金球獎勝算大增！

紐奴文迪斯早前幫PSG贏歐聯冠軍，依家又贏埋歐國聯兼當選MVP，擔任左閘嘅佢今場要防守拉明耶馬，但無損佢助攻能力，一個入波同一次傳中製造兩個入球。22歲嘅紐奴文迪斯今屆歐國聯10場踢足，交出1個入波同6次助攻，獲選MVP實至名歸。

紐奴文迪斯粉碎西班牙捧盃夢後，耶馬爭金球獎嘅本錢大減，意味優勢再次返去迪比利身上。紐奴文迪斯賽後表示：「我今季面對過好多偉大球員，不過今場我凍結咗耶馬，令佢做唔到佢最擅長嘅事。金球獎？迪比利同耶馬都有傑出球季，我當然希望迪比利贏，我哋仲會踢世冠盃，我會盡力去幫佢得獎。」