羅拔仔宣布退出波蘭：有普比斯就冇我！

波蘭傳奇球星羅拔利雲度夫斯基周一(9日)喺社交網宣布，佢已經決定退出國家隊，直到領隊普比斯唔再執教波蘭為止。「羅拔仔」日前被普比斯褫奪隊長職務，兩人信任關係完全破裂，國家隊未來「有你冇我」！

波蘭今個國際賽期對摩爾多瓦(熱身賽)同芬蘭(世盃外)，羅拔仔因「身心疲倦」為由未有入選，領隊普比斯周日(8日)透過波蘭足總發聲明，中場施連斯基會取代羅拔仔，成為波蘭國家隊正式隊長。羅拔仔被「燉冬菇」後，隨即發聲明反擊：「考慮到依家情況，同埋領隊對我失去信任，我決定只要普比斯一日仲執教波蘭，我都唔會再代表國家隊上陣，我仍然希望自己有機會再為世界最好嘅(波蘭)球迷比賽。」

現年36歲嘅羅拔仔，係波蘭史上上陣最多(158場)同入球最多(85球)紀錄保持者。至於52歲嘅普比斯，2023年由U21「升職」為大國腳主帥，去年歐國盃決賽周喺分組賽出局。