簽唔到瑞典神鋒　曼聯將改斟拖肥棄將

曼聯簽入馬菲奧斯根夏之後，斟介中鋒進展緩慢，最大目標利安戴納轉投車路士，麥比奧莫亦唔順利，收購魯賓艾摩廉士砵亭嫡系約基利斯更係障礙重重，據報紅魔鬼打算捨難取易，如果簽唔到中鋒，大轉向免費簽入愛華頓棄將卡維特利雲。

曼聯近日向賓福特斟介麥比奧莫，首次報價5,500萬鎊已被對方拒絕，賓福特等待曼聯加價，至於士砵亭神鋒約基利斯更屬搶手貨，而且開價7,500萬歐元(約6.7億港元)，曼聯現時財力已無力負擔。

英國傳媒報道，曼聯將會大反轉，準備實行B計劃，就係免費簽入愛華頓棄將卡維特利雲。

28歲嘅卡維特利雲今夏同愛華頓約滿，回復自由身，但佢今季表現低迷，僅上陣26場交出3球2助攻，曼聯正留意該前鋒去向，如果斟唔到中鋒，就會向佢埋手。

不過卡維特利雲都唔係冇市場，據稱熱刺亦對佢有興趣，可能到最後曼聯同熱刺要為該愛華頓棄將展開爭奪戰。