巴塞隆拿放售新星　有望加盟狼隊

U21歐國盃即將展開，成為新星表演舞台，往往吸引大球會關注，西班牙U21左後衞謝拉特馬田近日成為狼隊收購目標，所屬球會巴塞隆拿亦有意放售，佢下季好大機會登陸英超獻技。

巴塞隆拿原本正選左閘巴爾迪因為受傷，令現年23歲嘅謝拉特馬田有機會上位，各項賽事上陣42場入1球及6次助攻，表現備受好評。不過，一般相信謝拉特馬田只屬於「替工」，下季未必再有太多上陣時間，狼隊趁機提出收購呢位西班牙小國腳，巴塞對於出售佢持開放態度，皆因球會財政欠佳，希望賣人幫補收入。

據悉狼隊報價1,000萬鎊(約1.06億港元)轉會費買謝拉特馬田，但巴塞嫌對方出手太低，令交易出現阻滯。至於狼隊最終會唔會加碼，可能要睇謝拉特馬田喺今屆U21歐國盃表現而定，佢為前途必須搏盡。