曼聯用現金+舒克斯　交換奧森漢

曼聯想簽愛華頓棄將卡維特利雲，只係冇辦法之下嘅Plan B，現時情況佢哋未去到呢一步，據報曼聯近日就同尼日利亞神鋒域陀奧森漢有所接觸，打算用現金加約舒亞舒克斯作交易。

26歲嘅域陀奧森漢外借加拉塔沙雷期滿，返回拿玻里後，近日同沙特豪門希拉爾斟介，對方開出4,000萬歐元年薪，但遭拒絕，因為域陀奧森漢仍希望留喺歐洲，而且知道曼聯正物色中鋒，有意到英超發展。

域陀奧森漢高峰期身價高達1.2億歐元，但由於同拿玻里僅餘下最後1年合約，解約金只須7,500萬歐元(約6.7億港元)，而另邊廂士砵亭坐地起價，約基利斯解約金提高到8,000萬歐元(約7.17億港元)，簽入域陀奧森漢似乎更值得。

意大利傳媒報道，曼聯正研究如何與拿玻里談判，並嘗試將約舒亞舒克斯加入交易，因為曼聯如要簽新中鋒，必須將現時隊中幾位進攻球員出售，約舒亞舒克斯曾經在意甲有出色表現，對拿玻里有一定吸引力。