杜曹首敗！英格蘭歷史性不敵非洲球隊

以挑戰明年世盃冠軍為目標嘅英格蘭，周三(11日)凌晨熱身賽主場1比3輸畀塞內加爾，唔單止係德國領隊杜曹上任後首敗，亦係英格蘭歷史上首次輸畀非洲球隊。英格蘭老將基爾獲加今場成為輸波罪人，災難式表現受各界炮轟，國際賽生涯隨時玩完。

英格蘭上場世盃外1比0僅勝魚腩安道爾，杜曹領軍成效受到質疑，今場熱身賽迎戰塞內加爾，7分鐘就由哈利卡尼先開紀錄。英格蘭領先後漫不經心，40分鐘塞內加爾右路傳中，基爾獲加「散步式」防守走甩伊斯美拿沙亞，被對方快步衝前射成1比1。

換邊後英格蘭未見起色，塞內加爾62分鐘一次簡單後場長傳，哈比迪亞拉輕易突圍窄角度抽入。英格蘭喺84分鐘有祖迪比寧咸入波慘食「詐胡」，結果補時階段又有居迪斯鍾斯中場被逼甩，沙巴利快速反擊得手，為塞內加爾漂亮贏出3比1。

英格蘭之前21次對非洲球隊從未輸過，今次歷史性不敵塞內加爾後，領隊杜曹表示：「失望嘅戰果。塞內加爾係世界前20名球隊，我要睇下球員喺呢種情況下比賽情況，我哋應該踢得更聰明。世界盃唔係聽日開波，我哋仲有1年時間去準備。」

35歲老將基爾獲加今場意外正選上陣，但佢最大賣點嘅速度已大不如前，成為防守漏洞，曼聯名宿堅尼怒轟佢「防守懶散」兼「唔上心」，英國各大媒體評分都畀佢全場最低。今場第96次為英格蘭披甲嘅基爾獲加，「試用」失敗後似乎唔會再有機會，阿歷山大阿諾特預計會係杜曹嘅正選右閘。