曼聯新兵神助攻　安察洛堤執教巴西首勝出線

周三(11日)早上世界盃外圍賽南美洲區賽事，巴西由新領隊安察洛堤執教後第2場比賽，主場以1比0擊敗巴拉圭，提早2輪取得明年世界盃決賽周入場券。早前落實由狼隊轉投曼聯嘅前鋒馬菲奧斯根夏貢獻助攻，成為贏波功臣，紅魔鬼今次應該買啱人。

安察洛堤上仗首次率領「森巴兵團」比賽，僅打和厄瓜多爾0比0，今仗繼續採取穩陣戰術，具威脅攻門唔多，踢到44分鐘先至打開紀錄，馬菲奧斯根夏殺落禁區右路底線傳中，雲尼斯奧斯祖利亞近門撞入。

換邊之後，雙方陷入拉鋸戰，巴西雙翼拉芬夏比洛尼、加比爾馬天尼利曾有入波黃金機會，但都把握唔到，維持小勝1比0完場。巴西贏波後，拋離第7位委內瑞拉7分，剩下2輪賽事，「森巴兵團」肯定獲得前6位直接進身明年決賽周，延續每屆都有份參賽嘅紀錄。

另1場，已提早獲得出線權嘅阿根廷主場出擊，上半場24分鐘被哥倫比亞前鋒路易斯迪亞斯射破大門，換邊後仲有中場安素費南迪斯舉腳過高，踢中對手頭部，被球證出示紅牌趕出場。不過，阿根廷最後仍然憑泰亞高艾美達入波逼和1比1，繼續排榜首。

南美洲區6個直接出線名額已有3席名花有主，包括阿根廷、厄瓜多爾、巴西。