孫興民暗示離開熱刺：去邊度我都會踢好波！

南韓球星孫興民喺熱刺實現捧盃夢後，盛傳夏天可能離隊，「老孫」周二(10日)為南韓喺世盃外4比0贏科威特後，被問到去留問題，孫興民只係回應「睇下點」，更表示無論去邊間球會都繼續踢好波，暗示離隊可能性。

孫興民第134次代表南韓上陣，明年世盃決賽周會繼續領軍出征，不過佢仲係唔係熱刺球員就成疑問，盛傳有沙特豪門力斟佢加盟，孫興民表示：「我仲有1年合約，呢一刻冇咩好講，我哋要等待，睇下點發展。無論最後我去邊，我都會盡全力踢好波，呢一點唔會改變。」

熱刺今年初啟動孫興民合約內自動續約1年條款，不過消息指熱刺咁做，只係保障佢哋可以有轉會費收番，唔代表會繼續重用32歲嘅孫興民。熱刺早前將普斯迪高路炒魷，預料新帥上場，將會決定孫興民嘅前途問題。