約基利斯同士砵亭「反面」　曼聯機會來了

根據英國《每日郵報》爆料，士砵亭前鋒約基利斯不滿會方違反「君子協議」，唔肯畀佢以6,000萬歐元(約5.4億港元)轉會費離隊，令呢位27歲瑞典國腳非常憤怒，甚至刪除社交網帳戶嘅士砵亭標記，似乎已經同呢支葡超勁旅關係決裂，可能加速今夏走人。

據悉約基利斯現時合約有1億歐元買斷條款，佢同士砵亭訂立「君子協議」，只要有其他球會出到6,000萬歐元轉會費，士砵亭就必須放佢走。

不過，士砵亭現時「食言」，要求起碼8,000萬歐元，先至會出售佢，意味約基利斯「跳槽」機會大減，令佢非常不滿，刪除社交網帳戶嘅士砵亭標記，可能已下定決心要離隊。以往不時出現球員為咗轉會，不惜以罷操威脅，約基利斯會唔會出呢招，仍然係未知之數。

士砵亭教練雷波格斯拒絕評論約基利斯前途問題，似乎有心理準備可能留唔住佢，約基利斯今季士砵亭上陣52場入54球及13次助攻，曼聯、阿仙奴都有意簽入佢。