拒絕去沙特　迪奧想重投馬體會

AC米蘭左後衞迪奧靴南迪斯拒絕轉投沙特阿拉伯豪門希拉爾，現時有新去向，根據意大利傳媒爆料，呢位27歲法國國腳已經同馬德里體育會達成加盟協議，有望重投呢支西甲勁旅。

迪奧靴南迪斯只剩下1年合約，佢要求由現時450萬歐元年薪，增加至700萬歐元，同隊友拉菲爾利亞奧睇齊。不過，AC米蘭無法滿足呢位「帶刀侍衞」要求，並決定今夏出售佢，希望獲得3,000萬歐元收入。

迪奧靴南迪斯想重返母會馬體會，對方亦歡迎佢回歸，甚至已經達成個人待遇條約，現時只等兩間球會傾掂轉會費，就可以完成交易。

迪奧靴南迪斯出身於呢支西甲球隊青年軍，其後轉投皇馬，2019年加盟AC米蘭，上陣262場，並有34球進帳。