利物浦1.27億鎊簽華迪斯　再斟巴高拿造夢幻鋒線

英超冠軍利物浦打造夢幻鋒線！「紅軍」近期喺轉會市場非常進取，據報已扑錘用破英超轉會費紀錄嘅1.27億鎊，收購德國國腳科利安華迪斯，不過佢哋仲未夠喉，準備再用1億鎊搶簽法國翼鋒巴特利巴高拿，連同謝利美費林邦同接近成事嘅米路斯卻基斯，夏天轉會預算突破3億鎊大關。

利物浦同22歲嘅華迪斯早就傾掂個人條件，不過就轉會費同利華古遜一直拉鋸，著名記者羅曼諾同Ornstein日前證實，利物浦已同意用1.27億鎊(包括獎金條款)轉會費收購，呢個價格打破車路士2年前用1.15億鎊買摩西斯卡些度嘅紀錄，成為英超史上最高轉會費球員，只差最後細節就可落實。

英國《太陽報》報道，利物浦搞掂華迪斯後未收手，目標係再簽多一個攻擊球員，原本頭號人選係紐卡素嘅阿歷山大伊沙克，不過利物浦知道成事機會唔高，所以將巴黎聖日耳門(PSG)嘅巴高拿列為重點對象，呢位22歲新星下半季喺PSG失去正選，傳聞已同球會商討離隊可能性，據報轉會費將達1億鎊，有望同華迪斯、穆罕默德沙拿組成豪華三叉戟。

利物浦早前已用2,950萬鎊羅致荷蘭右閘謝利美費林邦，近日亦接近完成用4,000萬鎊收購般尼茅夫嘅右閘米路斯卻基斯，若果所有轉會計劃順利實現，今夏買人開支必突破3億鎊大關。利物浦亦打算賣人套現，達雲紐尼斯、迪亞高祖達同路易斯迪亞斯都被掛牌出售。